புதுடெல்லி, மார்ச் 26-
காகிதத்தில் அச்சடிக்கப்படும் ரூபாய் நோட்டுகள் காலப்போக்கில்
மக்கிப் போவதாலும், எளிதில் கிழிந்து விடுவதாலும் உலகிலேயே
முதன்முதலாக பிளாஸ்டிக் டாலர்களை 1968-ம் ஆண்டு ஆஸ்திரேலியா
அறிமுகப்படுத்தியது.
அதனைத் தொடர்ந்து, கனடா, சிங்கப்பூர் உள்ளிட்ட நாடுகளும் பிளாஸ்டிக்
நாணய முறையை கடைபிடிக்க தொடங்கின. தற்போது, உலகின் 30-க்கும்
மேற்பட்ட நாடுகளில் பிளாஸ்டிக் நாணய முறை பயன்பாட்டில் உள்ளது.
காகித நோட்டுகளை விட அதிக காலம் நீடித்து உழைப்பதாலும், எளிதில்
கள்ள நோட்டாக இவற்றை வெளி நபர்கள் தயாரிக்க முடியாது என்பதாலும்,
மேலும் பல நாடுகள் பிளாஸ்டிக் நாணயங்களை தயாரிப்பதில் ஆர்வம்
காட்டி வருகின்றன.இதனையடுத்து, இந்தியாவிலும் பிளாஸ்டிக் ரூபாய்களை
அறிமுகப்படுத்த ரிசர்வ் வங்கி கடந்த 2010-ம் ஆண்டில் முடிவு செய்தது.
முன் முயற்சியாக 10 ரூபாய் முக மதிப்பில் பிளாஸ்டிக் நாணயங்களை
தயாரிக்க தீர்மானித்த ரிசர்வ் வங்கி, இவற்றை தயாரிப்பதற்காக சமீபத்தில்
‘டெண்டர்’ வெளியிட்டது.
இது வரை 8 பிரபல நிறுவனங்களிடமிருந்து ‘டெண்டர்’ வந்துள்ளன. விரைவில்
இவை பரிசீலிக்கப்பட உள்ளன. இதன் அடிப்படையில், குறைந்த செலவில்
தயாரிக்க முன்வரும் நிறுவனத்துக்கு அனுமதி அளிக்கப்படும்.
பிளாஸ்டிக் ரூபாய்களை அச்சடிக்கும் தொழில்நுட்பத்தில் நமது நாடு இன்னும்
மேம்பாடு அடையவில்லை என்பதால் இந்த நாணயங்கள், வெளிநாடுகளில்
உள்ள மிகுந்த பாதுகாப்புடன் கூடிய ரகசிய இடங்களில் தயாரிக்கப்படும்.
நமது நாட்டின் தட்பவெப்ப நிலைக்கு பிளாஸ்டிக் ரூபாய்கள்
தாக்குப்பிடிக்கின்றனவா? என்பதையும் சோதித்து அறிய வேண்டியுள்ளது.
எனவே முதலில் பிளாஸ்டிக் 10 ரூபாய்களை தயாரிக்கவும், படிப்படியாக
நூறு ரூபாய் முக மதிப்புள்ள நாணயங்களை அறிமுகப்படுத்தவும்
ஆயத்தமாகி வரும் ரிசர்வ் வங்கி, புதிதாக தயாரிக்க திட்டமிடப்பட்டுள்ள
நூறு கோடி பிளாஸ்டிக் 10 ரூபாய்களை கேரளாவின் கொச்சி,
கர்நாடகத்தின் மைசூர், ராஜஸ்தானின் ஜெய்ப்பூர், ஒடிசாவின் புவனேஸ்வர்
மற்றும் இமாச்சலபிரதேசத்தின் சிம்லா ஆகிய 5 நகரங்களில் அறிமுகப்படுத்த
உள்ளது.
இந்த புதிய முயற்சிக்கு கிடைக்கும் வரவேற்பையடுத்து, படிப்படியாக நாடு முழுவதும் பிளாஸ்டிக் ரூபாய்களை நடைமுறைப்படுத்த ரிசர்வ் வங்கி திட்டமிட்டுள்ளது.[/size]
கருத்துகள் இல்லை:
கருத்துரையிடுக